السلام عليكم يا moslemwriter
و الله يا أختى انا كنت عاملة زيك كده كل ما اشوف حد اساله انت بتنظم وقتك ازاى؟ لحد ما الوقت اتنظم لوحده
بصى يا سيتى آخر معلومة وصلتنى من محفظة القرآن انى ادعى ربنا و اقول يا مقيت و جربتها و الله ونفعت.بس انت عشان عايزة بالتفصيل حاقولك
انا عندى ولد فى ثالثة و بنت كى جى 2 و مضحكش عليكى لما كان ابنى فى اولى و بنتى 3 سنين كنت على طول باشتكى من الوقت و مش بالحق حتى اعمل ابسط حقوقى البشرية كدحول الحمام مثلا.بس هى المسألة تعود و مفيش حاجة اسمها جدول لانه طبيعى بيتكسر مع اى ظرف خارجى بس فيه خطوط عريضة ممكن تتعمل و خاصة لو واحدة بتشتغل زيى
الاساسيات : الطبخ - الغسيل - المذاكرة - تنظيف الشقة
الطبخ :
احنا نجيب خضار الاسبوع ونضفه و احنا بنتفرج على مسلسل او فيلم بس يا ريت عربى عشان متنشغليش بالقراية و تقعدى 3 ساعات فى حاجة تخلص فى نص ساعة و يا سلام لو بسلة و تقولى لابنك يساعدك منها لعب و منها هزار ومنها شغلانة و اتشالت عنك.و تحطى الخضار فى اكياس فى الفريزير.
تجيبى طماطم و بصل و تضربيهم مع بعض بكمية تكفى اسبوع و تقسميها على اكياس فى الفريزر .
ولا الطبخ اجدع طبخة فى الدنيا مش بتاخد اكتر من نص ساعة تحضير و ساعة تسويةو الرز خمس دقايق تحضير و نص ساعة تسوية يبقى الاكل كله ياخد منك ساعة و نص فى اليوم تعمليها لاالصبح او بالليل زى ما تحبى.
الغسيل:
طبيعى الاطفال الضغيريرن غسيلهم كتير و خاصة لو فيه تمارين فى النادى او زيارات مستمرة و عندك السنتين دى اكيد بتفعكش فى كل حاجة طيب الغسالة امكانيتها تشتغل مرتين بينهم مالا يقل عن 8 ساعات لصيانتها انا باحط شوية غسيل الصبح و اطلع غسيل بالليل انشره واول ما جى من الشغل انشر عسيل الصبح و بالليل احط شوية كمان الموضوع ده منتظم فى الصيف لان الغسيل بينشف بسرعة اما فى الشتا بيبقى مرة واحدة فى اليوم.و مشكلتى انا الشخصية التطبيق لانه ممكن يقعد يومين كده من غير تطبيق و يبقى تل هدوم اجيبه بالليل بعد ما الاولاد تنام او وانا باسمع لابنى اى درس و اطبقه.
المذاكرة :
لو استطعتى ان تنظمى وقت المذاكرة و تأكدى انك لا تحتاجين اكثر من ساعتين يوميا يقسمو حسب عمر الطفل لان قدرة استيعاب الاطفال هى عمرهم +2 يعنى لو طفل عنده 6 سنوات حيركز معاكى 8 دقايق شرح بس و ممكن يحل بعدها نص ساعة لوحده.حتلاقى نفسك بتضيعى وقت كتير شرح للطفل و هو فاصل اصلا الشوية الاولانيين بس هما اللى دخلوا و الباقى مشاكسة يبقى استغلى الوقت الباقى فى الحل.انا باطبع لاولادى شيتات المراجعة و باصورلهم البوكليت عشان يحلوا تانى عشان المعلومة تسبت.و ربنا هو المعين
نظافة الشقة:
باستعين بواحدة بتجيلى مرة فى الاسبوع عشان الحاجات الصعبة عليا زى تنفيض الشبابيك و تلميع النجف بس مضحكشي عليكى انا بانضف يوم و يوم اوضة واحدة بس.و زى ما تيجى بقى و الحمد لله زوجى عامل مش واخد باله.
استعينى بالله و فكرى ازاى تساعدى نفسك و حطى المواعيد اللى ضرورى بتحصل زى التمارين الدروس القرآن و النووووووووووووووووم
نصيحة أخيرة اطفى التليفزيون و استعملى الكمبيوتر فى اضيق الحدود و افصلى التليفون لما تيجى تنامى او لما تكونوا بتذاكروا .لقد طلب منا الرسول الاستئذان ثلاث و مكنش عندهم تليفونات يعنى حد كلف خاطره و راح زار حد و خبط ثلاث مرات و التانى مردش المفروض يمشى و هو مش زعلان على المشوار فمابالك بالتليفون الوقت اللى تحسى انك محتاجة تخلصى فيه حاجة معينة ركزى فى الحاجة دى لحد ما تخلص و ساعتها حتحسى ان نفسيتك استريحت و بقى عندك وقت انتى شخصيا تمسكى التليفون و ترغى فيه شوية.
جملتى الشهيرة معلش طولت عليكىبس اعمل ايه انا رغاية بطبعى و دى فرصة جميلة لمعرفتك
ريهام شاكر